گەنج دناڤبەرا بێکاریێ و قەیرانێ دا

گەنج دناڤبەرا بێکاریێ و قەیرانێ دا

رەڤین سالح
بێکاری ئێک ژ ئاریشەیێن بەربەلاڤە کو گەنج د جڤاکی دا توش دبیتێ و کارتێکرنێن خوە یێن نیگەتێف ل سەر وان ھەیە، ژ ئالیێ ئابۆری جڤاکی دەروونی ، ئاریشەکا دی زێدە دکەت دبیتە بارگرانی دناڤ وەلاتی دا، ھەر کەسەکێ کار نەبیت دھێتە دخانا بەتالییێ دا، ژ بەرکو دبەرھەڤن بۆ کاری و بەردەوام د لێگەریانێ دانە لێ چ کار ب دەست وان ناکەڤیت، ژ ئەگەرێ ڤالاتییێ گەنج پەنایێ دبەتە بەر مادێن بێھوشکەر تا دگەھیتە وی رادەی ببنە مەترسی ل سەر خێزانێ و جڤاکێ تێدا دژین، دەما رێژەیا ھەژارییێ زۆر بیت و قەیران دناف وەلاتی یا بەردەوام بیت، کریارێن دزییێ و کوشتنێ ژی زۆر دبن، ئەگەر ژی ئەوە کو گەنجی چ کارێن دەست نیشانکری نینە بکەت و رۆژا خوە بورینت کو مێشکێ وی ھەموو ل کاری بیت، ژ بەھندێ پەنایێ دبەتە بەر ڤان تاوانا .

بلندبوونا رێژەیا بەتالیێ بتنێ کارتێکرنێ ل سەر وەرارا ئابوری یا وەلاتی ناکەت، بەلکو کارتێکرنێ ل جڤاکی ژی دکەت و دبیتە ئەگەرێ گەلەک دەردێن جڤاکی دناڤ تەخا گەنجان دا، ژبەرکو پەیوەندییەکا موکم یا دنافبەرا بەتالی و ھەژاری و تاوانێ دا ھەی، وەکو چەوا فەیلەسوفێ فەرەنسی روسودبێژیت:  (ھەژاری مەزنترین تاوانە)، د جڤاکێن ساخلەم دا تاوانبار دکێمن، ھەروەسان فەیلەسوفێ مەزن دیکارت دبێژیت: (دزی تاوانا ھەژاریێ یە)، ڤێجا چەند بەتالی بەرەڤ زێدە بوونێ بچیت دێ رێژەیا ھەژارییێ و تاوانێ زێدە بیت، دیسان رێژەیا خوەکوشتنێ ژی زێدە دبیت، ژبەرکو دبینت بۆ ماوەیەکێ درێژ بێکار مایە و ھزر دکەت ئێدی چ دەرگەھێن دی بۆ ناڤەبن کو د ژیانێ دا بژیت، رەوشا وی یا دەروونی تێک دچیت و دگەھیتە وی رادەی دوماھی ب ژیانا خوە بینت و ھزردکەت کو باشترین کارە کری دا ژ ڤێ ئالوزییێ قورتال بیت .
نە گونەھا گەنجی یە دەما خواندنا خوە تەمام بکەت، بێکار بیت، فەرە ل سەر حکومەتێ کو ھزر ل گەنجی بکەن دا پاشەروژا وی ب ھەروە نەچیت، ژبەرکو ھەر گەنجەک خودان ھزر و دیتنەک جودایە، فەرە دەرفەتێن کاری بۆ وان بھێنە دابینکرن داکو بشێن داھێنانێن خوە دیار بکەن و دەلیڤێ بدەنە گەنجی پوستێن کارگێری یان ھەر پوستەکێ دی وەربگریت، دیسان دڤێت کەرتێن تایبەت دناف جڤاکی دا زێدە بن ئەڤە دبیتە ئەگەر کو بارگرانی ل سەر ملێن حکومەتێ سڤک بیت، ئەگەر گەنجی کار نەبیت و دیت د وەلاتێ خوە دا چ پیتەدان و خزمەت بۆ ناھێتەکرن، خۆ ھەکە چ کارێن خراب دناڤ جڤاکی دا نەکەت دێ پەنایێ بەتە بەر کۆچبەرییێ ، لێ ئەڤە مەزنترین خەلەتی یە دھێتەکرن ،چونکو وەلات ل سەر دەستێن وان و بداھێنانێن وان یێن سەردەم دھێتە ئاڤاکرن .
جھێ داخێ یە ئەڤ قەیرانا ئابوری ھند درێژبووی وسیاسەتمەدارێن مە ھاولاتییێ خوە ژ بیرکرییە تنێ ھزرا وان ل بەرژەوەندییێن وانە، سێ سال بورین ھیچ لایەنەکی نەشیایە ڤێ قەیرانێ ب دوماھی بینت، ژبەرکو رۆژانە کۆمبوونێن سیاسەتمەداران بێ ئەنجام ب دوماھی دھێن، ئەڤە ھەموو دبنە ئەگەر کارتێکرن ل ژیانا گەنجی بھێتەکرن، گەنج ھزر د وەلاتەکێ ئارام دا دکەت داکو بشێت بژیت و د ژیێ مایی دا پاشەرۆژەک گەش ھەبیت، لێ ئەگەر بەروڤاژی بو کو مروڤ د وەلاتەکێ پر قەیران دا بژیت و بێکاری زۆر ببیت، بھایێن ھەر تشتەکی د بازاری دا یێ بلند بیت و دەستهەلاتێ ئاگەهـ ژ رەوشا ھەژاری و دەست کورتان نەبیت، ل وی دەمی ھێلانا وەلاتی ئەرکەکێ نشتیمانی یە.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.